أموت واقف...
عشان عمر النخيل ما يموت سوى واقف
جدوره جوه أرض النيل
بكل الحب ممدوده
وسعفاته لفوق في الجو مفروده
ومشدودة
وعمري ما اميل
ولو كات الرياح طاغيه
ولو هد الطوفان الحيل
عزيمتي للسما ماضيه.
وعمري ما اخاف.
وهل أبصرت يا صاحبي
على مد السما والشوف
نخيل بيخاف؟!
ولا فوق راسو شد لحاف؟!
وغمض عينه أو يوم نام
عن اللي شايفه بعيونه
في صبح وليل؟!
دا أنا ابن النيل
بغني للبلد مواويل
وع. الجبهة بتلقاني واقف زنهار
في وش الريح
وكل اصحابي عارفيني مع المجاريح
بمد الإيد
وعمري ف. يوم ما كنت بعيد
عشان دا واجبي ورسالتي
عشان شمعة بلدنا تقيد
عشان خيرها تمللي يزيد
برغم رذالة المناكيد
وأنا عارف
هموت واقف
عشان عمري ما كنت جبان
ولا عن دوري بتنكر
ولا م. المعركة بهرب وبتستر
ورا الجدران.
يميني في الحروب ماسكة
بعزم السيف
ووقت السلم كراسة وقلم ملهوف
تمللي يطوف
ويقطف من جنينة الشعر أزهاره
ويهديها لست الكل مصر النيل
وللعقاد وطه حسين
وسومه لما بتغني كلام شوقي
وأبطالنا اللي بيضحوا
عشان مصر الكرامة تعيش
وللحرافيش
ما أنا شاعر.. وأنا عارف
بإن الساعة لما تحين..
هموت واقف.