لفيتك يالدروب الموحشه .. أستنطق الاطلال
تسولف عن غياب الخل .. عن لقياه ووصوله
عن الحلم الصغير اللي تهادى في حجاها ومال
.. معه نفح النسيم العذب سَوق المزن وهطوله
عن العهد القديم أسأل تبدل .. أو بقى لازال؟
أو انه مابقى ذاك الوفيّ الحافظ أصوله؟
أنا ياأطلال جيت أروي شقايه من سراب آمال
هداني وقتي اصناف العذاب ومُره وهوله
انا جيت أنبش الماضي أنا جيتك ردي الحال
ولك ذكرى بأعماق السنين العوج مجهوله
انا جيتك بلا زادٍ .. على درب الوله رحال
سوى قلبٍ بميدان الأسى له صوله وجوله
بديت أشك ياكذب الحقيقه والصحيح محال
وحيدٍ مااعَرف صاحب .. وانا دنياي مأهوله
انا مره تفرعنت .. ونويت بواقعي أحتال
واقول اني جمل مايشتكي ضهره من حموله
صحيت الضامي يناظر ولاغيره سراب اللال
ضعفت وغصب عن عيني اجاري الوقت وميوله
اساهر في ظلام الليل صادق دمعي الهمال
ومن مثلي .. يشوف ان البكا هو أسلم حلوله
تعبت اداري أوجاع الزمن صابر على كل حال
واشوف الحزن عشعش ف الفؤاد ويقرع طبوله
كأنك يازمن داين .. ترد الدين بالمكيال
كثر دينك .. يلبّي خنجرك طعنات مدبوله
انا مستقبلي بيدين حظي هالردي ينهال
مشيت ولادريت ان النهايه درب مقفوله
تِعب يااطلال منهو يرتجي فمْشاهدَتك وصال
حنينٍ قادني يمك .. هوى ذكراي مرسوله
انا جيتك افضفض لك همومٍ داخلي ثقال
واناظر ف أروقتْك اللي بريح المسك مغسوله
ومادام اني وحيد اوعدْك ماانساك ياالاطلال
لأني وافي لحبك .. ورجْلٍ يعرف أصوله