تدرين ياحلوتي وشهو يحلي القصيد؟
وأحلّق بفكري التواق .. صوب الغمام
وأروض أبياته الصعبه وقافٍ عنيد
لين أعسف المهره الجامح بجيد اللجام
لامن وصفتك .. وشب الحبر نار بجريد
وترقص على سطور بوحي هالمعاني هيام
ياملهمة شعري ياالحسن الوحيد الفريد
يامن رسمتي على شفة سنيني إبتسام
تعالي .. الليل ليلك .. والقمر يستزيد ..
من طلتك ضي .. يجلابه جميع العسام
يااجمل حكاية هوى يافال مشرق سعيد
يااروع بداية عمر .. مايعترف بالختام
عمري بدونك ياقرة ناظري وش يريد؟
عساه يفنى مع الفاني ويصبح عدام
فتح لك قلبي المغلق والاشواق بيد
لين إنطبع حبك الصادق ببابه وسام
وعزفت لك من احاسيسي الشجيه نشيد
والفكر بأعذب خيالاته تعلّا .. وهام
في طلتك تصبح اللحظات فرحة وعيد
القلب يوقف على حيله قدر واحترام
كل الوصوف البهيه .. من بهاءك تزيد
سبحان منهو وهبك الحسن بأعلى مقام
سوالفك تنعش القلب المعنّى .. وتبيد
همومي المتعبه .. وتصير برد وسلام
لك داخلي حب راسي كالجبل مايحيد
يشعل بدربي ضيا يطرد فلول الظلام
شاعرك ياحلوتي .. مهما يزيد ويعيد
مهما نبغ وف بحور الشعر جازف وعام
لاصار شعره ماهو لخاطرك وش هو الجديد؟
يجيك باهت بلا معنى .. وأيَّة كلام