لاترتجين اللي طلبتي مراحه
مهما طلعتي فوق ولا حدرتي
حب دمرتي مستحيل صلاحه
معاد ينفع فيه لو أعتذرتي
انتي سبب بنيه وسبت مطاحه
وأنا كسبت الوقت وانتي خسرتي
أنتي خسرتي نبع عذب قراحه
أخطيتي التقدير وألا أنقمرتي
واليوم رغم المعرفه والفصاحه
على مقاوم كلمتي ماقدرتي
صرتي من اللي دمع عينه سلاحه
ومهما نثرتي دمعتك مانتصرتي
عينك تكسر في هدبها رماحه
وأنتي بعد قدام عيني صغرتي
ماتعرفين الحب خلي أوشاحه
مانتي بوايا الحب مهما كبرتي
ياخاينه حبي على شكل واحه
وأنا أحمدالله دون حبي قصرتي
حبي المجروح.. الفؤاد أستراحه
لو تعرفي معناه كان انقهرتي
الحب فيه الصدق فيه الصراحه
وفيه الحقيقه لو محيطه عبرتي
لا شك مانتي تفهمين أسباحه
خفتي من الواقع وفيه أنكسرتي
روحي مراح اللي يرفرف جناحه
أنتي غدرتيبي لاشك أنغدرتي
مشروع غدرك لاترجي نجاحه
مادام توك في خطاك أفتكرتي