ياغايتي ومناي قلبي يناديك
لا افقدك وابكيك دمع ونحايب
ياغايتي والقلب يرجيك يرجيك
رجوى السقيم الي فقدله طبايب
العام كنتي حلم اكتبك وامحيك
واليوم مثل العام كلك نشايب
حال الفقير الي غدابك ويبغيك
ماهاب من ضيقه ولا صار هايب
ماعلمه فقره يخونك ويشقيك
اصيل ماتجحد عيونه حبايب
شمالين يهوى بروحه ويفديك
طنيان راسه لو دونك حرايب
يمطر عليك الوصل بأبيات وتجيك
ممزوجةٍ بالطيب مثل السحايب
ياغايتي وإن كان هالبُعد ينجيك
انا على لقياك.. ماني بتايب
قد قلتها مبطي وارجع اخليك
تسمع لقولي دون حق وطلايب
ضاق الفضا وانا بروحي احاتيك
ياضيق صدر الشمري وانت غايب
خلك على فرقاك تبعد وانا ارجيك
وابكيك حتى يصبح الدمع ذايب
عبارةٍ قد قلتها في معاليك
منها جروح الفقد فيني عطايب
الشوق والفرقى ولقيا موانيك
وسفن الوصال الي خذتها الهبايب
كنا قبل عامين نرجيك نرجيك
واليوم من رجوآك ذقنا المصايب
ياغايتي ومناي قلبي يناديك
لا افقدك وابكيك دمع ونحايب