الحمير اللى ف بلدنا كل يوم بتزيد حمار
طبعا إنت مش مصدق أو واخدنى معاك هزار
طب تعالى نقول كلام من غير صراخ ولا زعيق
وبلاش نصرخ.. نجعر أو نزود ف النهيق
لما كل شىء أوامر وانت بتنفذ يا خال
ولما ينادى يقول يا تامر وانت قدامك نوال
ولما كل شىء يزيد والفساد بتزودوه
كل واحد جى يحكم يفتكر ده مال أبوه
المصيبة مش ف فكره المصيبة ف مين جابوه
كل واحد ييجى يحكم يقول لنا شدوا الحزام
وكل شىء ليهم حلال وكل شىء لينا حرام
وانت بتقول نفسى أهدى روحى لتراب الوطن
والحسين مقتول أمامك وانقتل قبله حسن
واللى متعلق ف يافطه دا اللى فضل لنتحار
والديابه ف مصر شافطة الجنيه ويا الدولار
وكل حاكم يستخفك وإنت داير ف المدار
ومهما يعمل فيك مصدق مانت يا واد لساك حمار