لا تعايرني بحاجه وانت اسباب احتياجي
شاللذي بس اقترفته ولا عيون ولا يدين
ياه من ظَرفٍ اعيشه والهوى فيّ ازدواجي
كم يذوقني المآسي وحجم ضعفي له يبين
ما قدرت اقوى طبوعك يا لبى عزي وتاجي
حايره كلي تصور كيف يحتار الضنين
لا حبيبه صار يمه عاجزٍ والقلب راجي
كلمةٍ تشفي جروحه من حبيبه كلمتين
آه يا قلبي طلبتك،، بيننا تِم امتزاجي
مثل ما تطلب طلبتك والهوى ردٍ ودين
خذ لهيبٍ محتويني لا تِهيج بي عجاجي
ورد لي شين تركته بين اهدابٍ غفين
فلني منك وافلك ضمني لف اعوجاجي
بين ثنياتك ابيني،، بانيه حصنٍ حصين
ما ابي غيرك معايه لا بدا نبضك يناجي
لا بدت عينك حكاية اطربن لامن حكين
ملجمه والحلم سارح ابتدت جلسه علاجي
والحكي ذربٍ يذوب لا تلبسني أزين
فارسٍ والصيد حرفه،، حكمها طبعٍ مزاجي
ما لقيت الا خفوقي،، عالقٍ وسط الكمين
لا كلامٍ لا وصوفٍ لا عتابٍ واحتجاجي
راضيٍ والحكم باين خلف قضبانه سجين
ما ابي تطلق سراحي خلني ارضي احتياجي
خلني اشفي جروحي من شِقا عمره سنين