يابَعَد من يجون ، وكنّهم يبعدون
جيت لي من هناك وكنت عندك هناك!
يا هلا فيك ، و فراقك جروح وشجون
كثرهن يا هلابك ، يا عساهن فداك
لا تحيّر ، و ردّ الباب دون الظنون
وادخل القلب ، مابه غيرك الا غلاك
هايمك ما يخون ، و عزّته ما تهون
وانت لو كنت مثل اللي نساهم نساك!
والله اني ما اشيل الهم لو ما تمون
لا ، ولا شلت جمر الشوق لو ما زهاك
يا قليله عليك ان قلت لك ياحنون
انت ، ويا كثر حبك ، كثر حبك ملاك
كنت احبك خيال ٍ ماحسبته يكون
كيف ما دامك احلى من خيالي هذاك؟!
النظر لك ، وقلبي لك ، وحبي جنون
وانت بالقلب ، والا بالعيون بهواك
يا شبيه..او سواك بوصفهم يشبهون
كيف اشبهِك باللي ما وصل مستواك؟!
وديّ اسمع ، وابسمع من حديث المزون
لا تنقّى الكلام العذب تظلم شفاك!
حّدك الروح يا غيث الحنان الهتون
وكان ما أمداك عمرالوصل ،عمري مداك
وان سهيت وخذتني لك، وعنك العيون
وشهو احلى من السجَّه بدنيا بهاك
كان ذا بعض وصلك ، جعلهم مايجون
وكان ذا بعض زينك وش تركت لسواك؟!