في داخلي يا صاحبي شرّف الضيق
وإنسلّ سيفٍ من عنى الهم ذبّاح
وكنّي على متني توهّقت بطويق
عيب ان حذفته وان تناسيت ما طاح
وكلّي من الداخل ملفّات تحقيق
وباب الإجابه منكسر فيه مفتاح
واللي تعلّم من كبار الخوازيق
ما هو مثل من يستمع هرج نصّاح
أرقَبت مرقابي أجرّ الطواريق
لعلّ ما خيّم على القلب ينزاح
هذي ردات الحظ وقِلّ التوافيق
تكاتفنّ بقلب ساطي وسفّاح
ثم قمت أنبّش في قديم الصناديق
وأشوف نفسي بالزمان الذي راح
وش قدّمَت يمناي بين المخاليق
وأنا أحمد الله غانم العلم مسباح
ما فكّتَه يمناي حِلف ومواثيق
ولي سكّتي بالطيب مضوى ومسراح
ومن زود حملي شفني آغيب وآفيق
كنّي طريدٍ ما لقى وقت يرتاح
الوقت نسّقني مع الضيق تنسيق
ماله على غيري مجيَّه ومرواح
من غيبَة الشمس إحسب لفكّة الريق
صاحي وموجات الفكر ما هن صحَاح
بمدخَل حياتي لوحه.. بدون تعليق
واللي نشَد.. قولوا له طويق ما طاح