اركزت رمحي في حشى مظلم الوقت
بأحيي صباحٍ قالوا الناس ميّت
ورفعت راسي للسما..لكن أطرقت
لأنّ الظروف اللي على البال عيّت
معذور يا هذا الفضا لو تشقّقت
والبيد في ظلّ انشطارك تفيّت
مثلي ليا منّي سئمت وتضايقت
أفجّ صدرٍ بالذي فيه بيّت
لأن العذاب الواقع اللي به أغرقت
آمال ناسٍ للردى ما تريّت
لقيتهم نالوا وأنا اللي توهّقت
وخيبات حلمٍ بالمعاليق حيّت
وصحيت توّي من غيابي وصدّقت
ان الظروف اللي ابي ما تهيّت
يا موج حتى وان عليت وتصافقت
بأيّت حقايق بأقتنع قول بأيّت
ان ما دحمت جموع موجك وفرّقت
علّمهم انّي من كذا عام ميّت