ماهو تمني لجل انا اقول ياليت
ماحال دون معانق الشوق حراس
لالا ولاني من تجافيك حسيت
جفوة جحود بقلبه البغض غراس
لوكان هذا الي بفعلك تمنيت
ماساق هاجوس الشعر شرهة اعماس
فيك القصايد والعتب فيك غنيت
طاروق جذبه من معاليق يباس
عقب الموده كيف عني تخليت
خليتني مابين حيره ووسواس
مديت لك كاس الوفا وانت مديت
كاس الجفا الي مشربه ظيم الاحساس
اسقيك صافي ود قلبي ولااسقيت
ضامي وصالك كود من مرة الياس
لا اقفيت تقبل لي ولا اقبلت قفيت
حاير ويمسي طالب ارضاك محتاس
لاني سليت ولانت اشوفك تسليت
عني ولوعة غيبتك مالها اقياس
وشلون يامنهو بنا داخلي بيت
في مامضى لك ثابت اخلاصك الساس
علمتني كيف الوفا يومك اوفيت
علقت منهو محتمي بين الاقواس
باسباب لطفك بين الاضلاع حطيت
لك بالصدوق الي شرى الود مجلاس
وشلون يامن لاتبعثرت لميت
باحضانك الي لمته لذة انعاس
اشريك من حس الزعل كاني اخطيت
وارضيك لويزعج صفا بالك اوناس
وانا بعد ذقت الشهد منك حنيت
لاحساس منهو للمحبين نبراس
حالي لوانك في وصوفه تحليت
عقب البطا صاير مثل شايب ادباس
حالي مثل حاله من البعد ونيت
ونين من رجله غدت تقل مقواس
يرجي ثمر قلبه وانالك ترجيت
منك النظر يرفق على قلب وجاس
موجس من الفرقا كثير التناهيت
منها برق شيبه على جانب الراس
والموت ماله لوحسبناه توقيت
لابد مايقطع لنا حبل الانفاس
سنه فرضها للبشر خالق البيت
الواحد الفرد الصمد مالك الناس
القادر الي للحشر يبعث الميت
الكافي الي رحمته تذهب الباس
سبحانه الي عالم بكل ما اخفيت
منبت مزاهير النفل فوق الاطعاس
الي رفعك ابداخلي يوم حبيت
طبع الوداد وقبلتك بين الاجناس
والي جمعنا طالبه لاتوريت
تحت الثرى يجعل لي بستره لباس