يالادمي ما دمت باقي وموجود
اسلك طريق اللي لخلقه شفيعي
صل الصلاة اللي بها الخير والفود
تراك مع ليام مثل الوديعي
وبالناس تلقا راعي الخلق محمود
وما تعمله في صفحتك ما يضيعي
عش ما بقا واعرف ترا العمر محدود
والوقت يمضي في مسار سريعي
دنيا الفنى تنقص ولا تقبل الزود
ولا دامت الدنيا زهور وربيعي
وأحسب حسابك يوم شاهد ومشهود
في موقف هوله يشيب الرضيعي
سمعت قافٍ يشبه الندّ والعود
جابه رتيبان الذهين السبيعي
صدقت يا رتيبان والموت موعود
سوى سوى عنده جبان وشجيعي
واللى يظن أيامه سهود ومهود
لوكان في حصن حصين منيعي
من حوله الحراس ضباط وجنود
الكل تحت أوامره له مطيعي
لابد يصبح داخل القبر للدود
الموت يشحذ شفرته للجميعي
يقضي على الشبان والطفل والعود
كمن سليمٍ في ثواني صريعي