يا دمع فرصه في غياب المناديل
خذ راحتك لاطحت مادامني طحت
جرد الصحاري لا انكرت ظلمة الليل
الصبح يفضحها ومنبوتها سحت
وانا سريت الهم جمله وتفصيل
وعلقت قلبي لين من طيبه ارتحت
واعتقت لعيون السهر سبّق الخيل
وفي غفلة اشواق الوله سرّي افصحت
يوم انتثر بعضي غيوم وهماليل
أمسيت بهمومي وبهمومي اصبحت
يا تاركتني للتعب شدّي الحيل
الحب صادق والزمن بالشقا بحت
لو تلمسين القلب تهدينه اكليل
لو ترسمين الشوق للشوق سانحت
تتلعثمين من الغلا والمواصيل
واقول لعيونك ليا شفتك افلحت
سودك وعودك والغنا والمواويل
راحت معك وانا بعد روحتك رحت
خلي مقابيل الليالي مقابيل
لمحت لك وان كان ما فادك افصحت
لا طاح دمعك ذي كفوفي مناديل
ماودي المح دمعتك دامني طحت