والله إني من الضيقة سوات الغرير
ودي أروح قبر أبوي وأبكي عليه
تربة القبر قوليله بكاي المرير
عقب وقتٍ تغير فيه لون الوجيه
جر دمع العيون اليوم سلك الحرير
جرها هاجسٍ يرعى خفوق النبيه
عشت عمري يتيم وذقت يتم الصغير
مير بعض الظروف تذّكر الرجل أبيه
لو بلغت أربعين احس ماني كبير
كل ظرفٍ يعزز حاجة الروح فيه
لستهلت جنوب وجاك سيلٍ معير
اذكر اللي سقاني حكمته من يديه
وكل ما رف شارب في مقامٍ خطير
أشعر أنه يدف الروح للي تبيه
ايه ميت لكنه حي وسط الضمير
آه لو حسوا بقلبي وش اللي يجيه
من وصايا تحفزني طوال المسير
ومن آمال بطفلٍ ما ذخر دمعتيه
والله اني على شانه لخوض العسير
لو كسرت العزيز ولو سهجت السفيه
يا العظيم الكريم ويا العليم القدير
ارحمه واكرمه يا رب وأحسن إليه