ياليلة البوح.. جيت بحزني المغري
ابشعل شموع نوحي واعزف اوتاري
وحيد بس الورق يحضن نَزِف حبري
وحيد ابدفن في صدرك غالي اسراري
ياليلتي.. هاجسي لافيك من بدري
على دروب السهر.. ابنثر ازهاري
جيتك مهاجر غريب ويعتصر فكري
لاطال عمر المسافة زانت اسفاري
مرات احس اني المحروم من صغري
لا ذا الوطن لي وطن ل الدار ذي داري
ومرات اقول الزمان مكتفٍ عمري
على يدينه.. يسيّر عتمة اقداري
مدري أو ادري واحاول اني ماادري
أو اني ادري واسوي ماني بداري
احتارت الأسئلة ياواقعي واثري
كل الإجابات تلبس بوحها العاري
يادمعة الحزن هلي ديمتك وإجري
العين ماتعرف الا دمعها طاري
تعتبت الملم شتاتي واحتضن صبري
غصب اتقبل ظروف الواقع الجاري
عزاي لاضاق صدري ببوحي اهذري
وأنزف مدادي كلامٍ واشحذ افكاري
والشعر لو مايجسد حالتي يسري
واشعاري إن ماانصفتني ماهي اشعاري