لَيْشْ الْمَحَارِمْ طَيّروا بْسُرْعَه
وِالْقَافْلِه مِشْيِتْ؟!
وْطَلِّتْ صَابِيعِكْ بِالْهَوَا تِرْعَى
وْعَ مْلاَمْحِي تِكْيِتْ
وْشَكِّتْ السَّاعَه عْقَارِبَا بْقَلْبِي
وِازْدَادِتْ الدَّقَّاتْ
وْخَافِتْ عْيُونِي.. وْحَالْتِي صَعْبِه
تِتْوَجَّعْ الدَّمْعَاتْ
وْصَارِتْ عَ وِجِّي تْطَرْطِشْ الْغَبْرَه
أَلْوَانْهَا وْتِمْشِي
تِفْرُشْ عَلَى خْدُودِي وَجَعْ بُكْرَا
وِتْوَسِّع الْفَرْشِه
وْمَا ضَلّْ عِنْدِي كْلاَمْ تَا قُولُو
ضَاع الْحَكِي فِيِّي
غْيَابِكْ قَتَلْنِي.. سَجّلِي فْصُولُو
وِتْرَحمِي عْلَيِّي!