وقف طريقي يشتكي ضيق الانفاس
زحمة عيون وناس والقلب فاضي
جرحٍ وظلمة ليل ونجوم حرّاس
كان الوعد بين السما والاراضي
لا ظلّمت تظهر شموسٍ من الياس
وطال الوعد عنّي وخاب افتراضي
امشي وادوّر دنيتي وسط هالناس
دام الزمن غادي وهالوقت ماضي
كاسٍ ملاه الوقت لي بنفض الكاس
واسْوَد همومي ما تغيّر بياضي
في هالعمر محبوبتي اصدق احساس
ما بين همسي ودمعتي وامتعاضي
حبيبتي اتعبني الهجْر هوجاس
واجمل دروب العاشقين التراضي
ناسٍ تهنّى بمجلس الحبّ جلاّس
وانا اشتكي منْك الجفا والتغاضي
ولو هي تعالت صرختي ظنّي لا باس
ولكن وش يهمْ صرختي واعتراضي
وان كانت جروحي على الحبّ مقياس
خطاي ابي عدلٍ وهالحبّ قاضي
علّه يجيني بعد هالجدب نسناس
وكان الرضا فرقى .. فلاني براضي.