فز حرفي وعلا ف الشوامخ يزور
درةٍ للحضارة شمسها ما تغيب
يا عروس المداين يالفرح يالسرور
قلت راس المنارة للمعالي طليب
جوهرة للبوادي سهلها والبحور
يا صروحٍ تعلت بين امس وقريب
فز حرفي وسافر من قديم الدهور
يا بلي طيف أصلٍ من أصولٍ عريب
الحروف أسبقتني ولا حوته السطور
دانةٍ في عيوني للمعاني.. أديب
شفت تاج الجواهر ف المجرة يدور
قلت حي المعاني جبتها تستجيب
قلت بمدح ثراها غصنها والجذور
لقيت كل المدايح في هواها تجيب
كلها عمان عقدٍ ودرة العقد نور
من ضياها تلبس كل لحنٍ رطيب
يا صحم عزف شاعر يوم شاف البدور
يا صحم كل شيءٍ من زهورك يطيب
عزكم ف المعالي وكل ظالم دحور
يا صحم كل أسمٍ في حضورك يذيب
يوم عرشك تجلى لبسوها زهور
في حماها أهلها كل شبٍ وشيب