ما دام جيتك وضوح انتي تعالي وضوح
ما جيت معتم عشان تجين لي معتمة
نخلة شعوري غدى الساقي عليها شحوح
والحين جيت أقطف الشاعر قبل موسمه
يا مسلمة: كل دربً قال لي روح روح
قولي له إني بروح اليوم يا مسلمة
يا لابسات المساء: ما فيه للصبح روح
إلا تهادت لربّ الجرح مستسلمة
جسم الزمن عاري إلا من ثياب النزوح
وانا أذكر إن الزمن في قمة الهندمة
استعرضه في مرايا ذكرياتي.. وأبوح
حتى يجي للمرايا تمتمة تمتمة
تقول: بتروح وين؟ آقول: أنا وين أروح؟
وأنا جروحي لها في وجه حلمي سمه
كأن ما فيه ضيقة من قبل عصر نوح.
لا وقتنا الحالي.. إلا جات لي ملهمة
أقول يا ضيقتي: ذا صدر ماهوب لوح
وتقول: بكتب عليه من الحزن ملحمة
وانا أعرف الضيقة إن مرت بشاعر طَمُوح
ما تتركه لين يخرج ضيقته من فمه
من وين أجيب أكسجين الضحك لا جيت أنوح
وصدر المواجع تنسّم لين ضاق إنسمه؟
أطباعي الهادئة.. فيها بقايا جموح
وانا عن الخيل.. خيلي ما تجي مُلجمة
بنيت لي في مساحات الأماني صروح
وصرح الأماني يجي جرح الزمن يهدمه
يا سارية: ممتلئ صدري وصدرك لحوح
ما عاد عندي سبب مقنع عشان أفهمه
أنا بوجه الحنين اللي بصدرك يفوح...
وغمازتك والدلع والكحل والسلهمة
لا تجرحيني.. وأنا مانيب ناقص جروح
ترى من العام.. جرح العام ينزف دمه
خليني أرحل على سكة رحيل الطموح
قبل الهوى يمتهن ظلمي وقبل أظلمه
خلاص.. جيتك وضوح أحتاج أروح بوضوح:
ما بأطفي الحلم.. ودروب الزمن معتمة