نبرات صوتك يالشوارع حزينه
انا اعرفك يا عاشقة صوت الأطفال
أدري بطبعك تكرهين السكينه
ضحكاتهم تسوى معك ألف موال
همّك بوسط ألعابهم تدفنينه
وباقي أثرهم في ملامحك ما زال
من هم درسه والكتب تسرقينه
ومع لعبته دايم يشيلك على البال
طفلٍ ولا منّه بكى تحضنينه
ويشعر بأنه لا مشى فيك يختال
طفلٍ يحاكي لعبته تذكرينه؟
بينك وبينه صاروا الأهل عذّال
كل ما ندهتي له يجي في حنينه
توّه صغير ولا عرف هم أو شال
يا ما حفظتي سرهم يا أمينه
يوم إرسموا بترابك أحلام وآمال
طفلك بكا ودّه يرجّع سنينه
روحه بقت طفله وهو صار رجّال
حلم الشوارع ضيّعته المدينه
وأطفالها صارت ملاعبهم أطلال