يا ورد أدري تنتظر كف محبوب
يا أجمل هدايا الحب وأجمل وهايب
ما هو بكيفك أدري بالأمر مقصوب
حطّوك وسط الكيس خايف وهايب
أدري قرار القتل ما كان لذنوب
وأدري بسكوتك أفضحتك الهبايب
لكن مقدّر يقطفونك ومكتوب
لو إن قرار القتل ما كان صايب
تقطف عشان قلوبنا تحب وتذوب
وتقطف لعودة كل محبوب غايب
ما يكفي إنّك تفرح الناس بطيوب
وإنك تكون علاج كل قلب ذايب
مرّات عطرك يغني عن ألف أسلوب
ومرّات لونك للتراضي سبايب
يا ورد يكفي عمرك صغير يا دوب
وتقدر تسوّي في القلوب العجايب
من ينكرك وإنت الذي حيل مرغوب
من ينكرك وإنتا رسول الحبايب
تجي وساطة حب من قلب لقلوب
وعمرك فلا ردّيت يا ورد خايب