ياصاحبي والوصيه من مراجعها

ياصاحبي والوصيه من مراجعها.

بقولها وإلعن إبليسك وشيطانك.

إحفظ مقامك ترى الكلمه مجامعها.

في عقلك وقلبك ومفتاح لحيانك.

النفس حاول عن الزلات تمنعها.

تل الرسن لايجيب الوقت حقرانك.

والروح لو ديرة الزله مرابعها.

امنع وساويسها لاتسرج حْصانك.

والهرجه اللي تناديها... مسامعها.

ثوب الندم ثوبها والشان من شانك.

والبندق اللي يقود زنادها اصبعها.

لو ثوّرت يحترق وردك وبستانك.

ماعاد تقدر ليا ثارت... ترجعها.

طلقه تعيب الوجه وزنادها لسانك.

كلمة خطآ عارفٍ قلبك مواجعها.

يسري بها لسان ليلك يم عدوانك.

ماتنفعك حسرةٍ.! شبّت مدامعها.

ولاتنفعك خوّة اللي صب بآذانك.

يشتالها كتف.. حاملها ومرضعها.

وجهك لها وجه والعنوان عنوانك.

الناس في فكرها تلقى مطامعها.

أبعد عن اللي يبي الميله.. لميزانك.

سطّح علاقتك والاّ طيع واقطعها.

عن شرذمه همها كله فخسرانك.

والكلمه اللي تمايل.! طيعني دعها.

اخاف من ميلها.! تنهد جدرانك.

والسالفه..! لايغرك زين مفرعها.

تبقى مع الناس والميدان ميدانك.

تسري لو ان الاوادم في مضاجعها.

تصبح على وجه شباكك وبيبانك.

اغنم هل الطيب دام الود جامعها.

وتجني علومٍ بها لولك ومرجانك.