قالوا : تجاهَل. قلت: ياما تجاهَلْت
و لقيت في بعض التجاهل مذَلّة
بعض البشر ما يستحي لا تحمَّلْت
و الطَّيِّب اللي يستحي يستغلّه
النوع هذا عامله مثل الأزفلْت
ليا متى جالس للأجواد علّة
وإن عاتبوك الناس به، قول: قَفّلْت
ما عاد أمَشّي له ولا رُبع زَلَّه
جاملْت حتى في حقوقي تساهلْت
على أمل عقله يُعُود و يدلّه
و بكل مَرّة يستخفّ إن تثاقلْت
يظن حلم الناس و الصبر فَلَّة
واليوم لو ناقش معي سالفَة قلت:
أسكت و كثر اللَّف و الهرج خَلّه
يمديك لو تبغىٰ تَعَدَّل تَعَدَّلت
الطِّيْب ما أثمر فيك والصبر لِلَّه
زاد احترامي للمغَثّة و طَوَّلْت
و الوقت حان أَنَزّله في مَحَلّه
حاوَلْت وأبْعَدْت وصبَرْت وتَحَمّلْت
و لاهو صحيح نجامل العمر كله