رجاءً ياتويتر خذ معك صوتٍ غدا مبحوح
وصبه في مسامع صاحبي في شكل تغريدَه
لعلّه لاسمع تغريدتك يَطرَب لها و يْروح
يتابع مصدر الصوت الشجي ويْجر تنهيدَه
أظنّه لا ذكر وقتٍ ملاه الهمس قبل البوح
يُوَفِّي ما بقى بمذكراته من مواعيده
وقل له يا تويتر بس يرجع والخطأ مسموح
صفحنا عن جميع أخطاه بس الهجر لا يْزيده
أبي من بسمته برق الحيا بين الضلوع يلوح
وتعشوشب رياض القلب وتعوّد زغاريده
أبيه يهدهِد القلب العليل المُتعَب المجروح
بلمسة حانية بِ إيدِه تزيل الهم وتبيده
أبيه يحرر الجفن الحزين من السهَر والنوح
أبي طفل الفرح يركض كفىٰ كبته وتعقيده
أنا مليت من كثر التّرَجّي ياخدين الروح
وأنا مليت من طول الكلام وكثر ترديده
وإذا ناوي تكمّل سيرة الهجران ياخي روح
خلاص أسلك طريقك بس قلبي فك له قيده
وإذا ناوي تعذبني ترى ما بالأذى مصلوح
ترى من صَد من دافع غلا نار الجفا تصيده