أحبك حنين واحبك جَمَال
واحبك ميتين مليون مُحَال
واحبك حقيقه واحبك خيال
يا ساكنه فى قلبي مده وسنين
أحبك يا قاسيه قساوة زمانى
أحبك ومهما سهمك رمانى
وهفضل أحبك وأكابد وأعاني
ومهما أسافر يجيبنى الحنين
أحبك يا غاليه وحبك غرام
وبحلم ف قومى أشوفك منام
نظرة عيونك يا غاليه كلام
يا لحنى الجميل ونايى الحزين
أحبك انتى ولا حد غيرك
ياللى مصيرى بيحضن مصيرك
وهفضل أحبك بشرك وخيرك
وأمسح دموعك عن الحزنانين
أحبك ولا حد غيرك هويت
فاكرك يا غاليه ولا يوم نسيت
ف حضنك فرحت ف حضنك بكيت
ويدعو ولادك واردد آمين
أحبك برغم الرئيس والوزير
أحبك بقلبى الحنون الصَّغير
أحبك غناوى واحبك هدير
واحبك غلابه وناس طيبين
أحبك يا نازل فيكى الكتاب
وأرضى ف هواكى يا مصر العذاب
وأدفع عنك بظفرِ وناب
دانتى وصية رسولنا الأمين
أحبك يا بلدى وكلى دموع
لدينّا يا بلدى ألا من رجوع
يا أتباع محمد وأتباع يسوع
إدعو لبلدى وهنقول آمين
أحبك ف حبك نسيت الزمان
أحبك شده واحبك حنان
يا ماليه زمانى وماليه المكان
يا كل البشارة لقلبى الحزين
أحبك يا بلدى من غير مزاد
وحبك ف قلبى هو المراد
واتمنى كل الخوارج تُباد
وتبقى يا بلدى ف أيد مسلمين
أحبك ولا حد غيرك يا مصر
وامسح دموعك وأهديكى نصر
واثبت قلوعك فى كل عصر
وأوهب غنايا لبائس حزين