لفظ بلا معنى وجسم بلا روح
هذي هي الدنيا والإنسان فيها
شمس الضحا غابت ولاعاد به ضوح
ما غير بعض الناس شبت ضويها
كنا على خوه وسجات ومزوح
لكن نسيناها مع من نسيها
هذا كتم سره وذا راح مفضوح
وذا بايع الصدقا وذا مشتريها
مدري متى البارق على الدار بيلوح
ما واجهتنا غيمة نرتجيها
يا عين اخطيتي ورا الدمع مسفوح
لا خير في دنيا بكيتي عليها
ويا قلب اتبع مدهلك وانت مسموح
وان ضامتك الأيام لا تشتكيها
اطلقت قيد الراحلة وقلت باروح
واكثر مراويحي عذاب عليها