لابتي بين القبايل لهم مجد وصيت
ما اعتزى الحيدر عليه السلام الا بها
لابتي يامية(ن) درع جنبي لاعتزيت
زلزلت بيبان لاتراك روس حرابها
لابتي سيل يدم الجذا فيما بغيت
لي عوت في نايفات الرجوم ذيابها
محزمي في كل هيه وسيفي لي عديت
تزبن الخايف وتاطا على حرابها
الرجا في الله رجيته ولا غيره رجيت
واسع الرحمة يخلص جميع انشابها
جارت الدنيا والأيام دارت وانكويت
واقبلت سود الليالي بسود اثيابها
تخلف النية ونا صادق يوم انتويت
مخلفات الظن يا رب تكفينا بها
ونتي يوم اتذكر زمان اللي هويت
يوم خذ روحي غزير الهدب واقفا بها
غبّته سبعين قامه ونا فيها غديت
والسفينة غارقه واغرقت ركابها
ما حكيت بسر زين الوصايف ما حكيت
بعض الاشيا يالاجاويد ما يحكابها
والله اني يوم عاهدت مضنوني وفيت
من عطى خله عهود اللّزم وفّابها
جادل في حبها لاسمعت ولا وعيت
لو يجون الترك والفرس دون أبوابها
يا سلام الله عليها بتالي ما بنيت
عد من زار المدينة ومن صلى بها