لو للخلايق في التمني صلاحي
طلعوا على متن السماوات ببروج
عذبت رجلي في المجي والمراحي
يا طول ما تعبت وأنا اسوجها سوج
دكت مشاريعي هبوب الرياحي
وأخر مشاوير العنا صرت مدهوج
معلوم أنا حظي تردى وطاحي
لولا رضاي بقسمتي طحت مفلوج
وان صحت ماهم الخلايق صياحي
وباب الفرج توي مقفل ومزنوج
يالله وأنا طالبك تطلق سراحي
عبدك على بابك ذليل(ن) ومشهوج
رزقك ولا رزق العبيد الشحاحي
صار يتحكم في العرب كل خجخوج
ليل الدجا يتلاه نور الصباحي
وذل الفقر لابد ينزاح ويموج
يالربع مكنوني على الناس باحي
للحب في قلبي حكايات وهروج
أنا ذبحني حب ظبي البياحي
والله ما مثله من البيض عمهوج
ما عاد في قلبي لغيره فساحي
ابو دليق كنه الليل منسوج
سحر العذارا في لذيذ المزاحي
والموت كله سلهمت كل مدعوج