ليه بس توعد بالغرام
إن كنت مش قد الكلام!
والتقيك لما أقابلك
تختفي وسط الزحام
وتيجي من تاني تصالحني
وتقوللي ياروحي سامحني
ويمر يوم.. تنسى هوايا
إيه حكايتك قوم صارحني
بكره تيجي مشتاق هوايا
وتقوللي نبدأ م البدايه
ردي ليك روح يالا وامشي
العب بغيري ومش معايا
الحب مش لعبه بايديك
بتعوزها وتجيبها اليك
واما تلعب بيها حبه
ويروح جمالها من عنيك
تقول خلاص وشبعت منها
وتروح وتلعب لعبه غيرها
تلعب شويه وترميها برضه
مدام بايدك انت مصيرها
ليه بتخدع ليه تغش؟
انت عندك الف وش؟
خساره اني ف يوم قابلتك
وحلمت أبني لحبي عش
بكره تندم لما اسيبك
والتقيك بتعض ايدك
بس ياخساره خلاص
الندم مش راح يفيدك
مش ح اسلم تاني امري
والحب عندي كل عمري
واللي يستاهله مش انت
إنت صفحه طويتها بدري
اياك اشوفك أو تشوفني
في الحب انت مش عارفني
لما احب أحب خالص
ولما باكره..تقول ياريتني