بلاش تضحك لي وانا كلي إهموم
يللي تركت الهم فيني علامك؟
خليتني من شوفتك حيل محروم
اتبع علومك وأتحرى سلامك
واليوم شفني في كوابيس وحلوم
عايش كئيب ومحتويني ظلامك
عن شوفتك والله مازلت مضيوم
ولولا الغلا يمدي نسينا احترامك
ابطيت ماطليت في طلّتك يوم
وشلون عينك تهتني في منامك
للشوق حزه وللسهر وقت مشئوم
وللحرف غصه لاكتبني كلامك
وللبؤس في ناظر عيوني على الدوم
متكيّده بطعون تحمل سهامك
بسك تجرعني غيابات وإسموم
وانا على هجرك اعاتب هيامك
ان كنت عايف ياخيال بلا لوم
بجروح صدر الشمري مايضامك
سافر وخل الي غدى كله إهموم
يعيش في همه ويرقب سلامك!