يا قلب شاعر فى مسيرة الجامعة
يا خدك حماس الشعر
تهتف كأنك حى
كل البلاد تسمعك
ومصر مش سامعه
مخنوقه بين ضلمتين
وانت بتنزف ضى
نص الوطن عسكر ونصه عبيد
بتخبى روحك ليه تروح لبعيد
دمك هدر يا محمد السقا
هتفت للقدس ماحلمتش تجيب شقه
عشان كده بتموت عشانها شهيد
بتموت يا واد من غير ما تسأل حد
بتموت ومتهيألك انك واخدها بجد
مجاش فى بالك يا واد
اسكندرية ورام الله تحت نفس الحصار؟
جيش الدفاع هوه فرق الأمن
مافيش خجل ولا احساس قوى بالعار
دم الشهيد لو للكرامه حن
تتفك عقدتنا بأغنيه!!