من الكباير احترام القرعجي والفسل
والابتسام الدبلوماسي ف وش أبو جهل
دول كلهم،مالهومش ف الحياة لازمة
رغاوي أزمة، حتخلص، لو يفوق العقل
من الكباير مجاملة التافهين
باسم التواضع،أو باسم الدين
ياما جرالنا م الحلول الوسط
ياما بلعنا الزلط، ومش عاجبين.
أنا يوم ما شفتك قلت ألف صلاة
علي النبي وآله واللي اتبع لهداه
ماهو جمالك من معجزات الكون
وهداية للمجنون، واللي شيطانه غواه
أجمل ما فيك أنت إن الفصول عرفاك
وانك دفا ف الشتا وف الربيع شباك
وف الخريف احنا ورق وريمته
ويا ريته كان يفضل طول السنة وياك
ومن الكباير، تواضع للي ما يسواش
خدام طموح أسياده والأوباش
جعجاع مظاهر الهيصة والتأييد
اللي عايزنا عبيد، ودماغنا ما تعلاش
ومن الكباير سندة الأندال
دلاديل كلابها وعبيد المال
مالنا ومالهم واللي بيساعهم
يا رب تبلعهم، شقوق زلزال
ازاي أبص ف عنيك وما اكتبشي
عن الحنان والأمل اللي مايكدبشي
مش فرفرة أحلام، الحب ف الستين
ومش حرام،مدام عاقلين ما بنعيبشي
ومن الكباير كبت المشاعر وكتم القلب
والخجل م الحياة، والشعور بالذنب
خلي الغنا مطلوق، طول م الأجل محتمل
مفيش حدود للأمل، مهما الزمن كان صعب
مش باقي ع المعاش غير حبة شهور
وبعدها مفيش لقا، غير ف إشارة المرور
بس أوعي تتخض لو مديتلك المناديل:
يسعد صباح الجميل، يومنا فرح وسرور
ومن الكباير لو رمتلي مناديلي
وقسيت علي غنايا ومواويلي
وصدمت قلبي ف دوسة البنزين
اشكي ساعتها لمين، ومين حيبكيلي؟
ان جيتو للحق، كل الشعر ده مكتوبله
عايش بذنبه، ازاي انا راح اتوبله؟
شوفولي حل، أحبه وادفع الكفَّارة
أصل العبارة، أنا قتيل حنيته ونبله
ان جينا للجد، تلات اربع الشعرا دول أوغاد
والربع بيشاور ومستني يجيله ميعاد
لو عُشرُهم وبحق، كانت البشاير هَلت
لكن المشاعر قَلت، والتجرمة ف ازدياد
إياك تصدق يا طيب، لو بلطجي، يبتسم
يدخل ف عبك، يلبك، علي قفاك يترسم
عايز تجيب آخره، ركز شويه معاه
شوف الاختلاف وياه، ازاي بيتحسم؟
لو محتارين قلبه عليها ولا هوه علي قلبها؟
شوفوه بيعمل إيه مع أي حد بيحبها
شهوة الافترا بالحب، ألعن من الكراهية
والبنت مصرية، ف كل أحوالها، بتحمد ربها
لو أحبك اكتر، قلبي حيوجعني
ده غير دماغي بيسخن، ممكن يضيعني
معادش أصلا مساحة لحد غيرك فيَّا
أنا اصطفيتك ليًَا، يا تري بتسمعني