أنا وقلبي ودنيا الحب واخدانا
وكنا زمان بنهرب م اللي جوانا
وفضلنا نهرب والحب كان غلاب
غير حياتنا وجاب الفرح ويانا
كنا طيور في السما طايرين بنعلى لفوق
لافكر ساكن في بالنا ولا يوم عرفنا الشوق
وأما طيور السما سهم الهوى صادها
نزلت تغني غناوي العشق للمعشوق
كانت بدايتي وانا سارح بسنارتي
أحلم بصيد السمك أصل السمك غايتي
إلا وعروس البحر طالعه تشاورلي
ندهت وقالت أنا سلمت لك رايتي
ياللي رماكي الهوى هوه انتي فكرتي
انا غريب عن هنا وإزاي كده اختارتي
قالت قابلتك من زمن من كام سنة عدت
وعمر صورتك مافارقت خيالي وشوقي ومرايتي
الفكر خادني ووداني وجابني ياناس
قبل النهارده ماكان للعشق عندي أساس
أنا كنت عايش وحيد والقلب كان خالي
عايش يدور بي الزمن من غير وجع في الراس
ياللي رماكي الغرام وهويتي سناري
أنا باعلن ان الهوى كان عندي مدَّاري
سلمت رايتي كمان أصل الهوى غلاب
تعالي يالا املكي قلبي وأفكاري