لو لك غرض

لو لَك غرض..

تنبِش في دفتر الهوى

وتمد جسر من الحديت

طمن فؤادك

كل اللي كان بيننا انطوىَّ

خلاص.. هوى

وأنا ما أرضالكش!

أنقل عَطاك.. عَ اللي ف هواك

يرضى الهوان

هوه اللي كان.. وياك زمان

برضُه ده تسميه أمان؟!

والا الزمان اللي كان.. شاهد عيان

يقدر للحظة.. ينسىَّ اللي كان؟!!

أيام مَ كُت.. تسوق في لوعك

مع إني رافضة.. أصبر وأطاوعك

منطق غريب.. وغريبة كنت ما بأفهمكش!!!

أقول ومالو

أشك فيا.. وأنت اللي عمري

ما أغلطكش!

هوه اللي كان.. بعد أما كان

ينعاد لأيه؟! ينعاد لمين؟!

بعد الحنين..

مَ أندار وفات لك المكان!

إذا كان لي عندك ذكرى حلوة..

افتكِر شيلها ف عينيك

بعينيك تلاقي صدقها..

أو يوم يصادفك زيها!

وإن كان لَك أنت.. عندي ذكرى

وحشة.. حلوة

خلاص خلاص شطبتها

ونصيحة لجلك حِسها

لو لك غرض

تنبِش في دفتر الهوى

وتقيد جراح..

ما بقاش هناك.. إلا الرماد

كل الصُفح.. إصفر لونها

صعب الرجوع ليها.. أو حتى تطولها

جسم الجريمة اللي بيديك..

أصبح رُفات

وداب وراح!

وإن كنت فاكر السنين

تشيل من عليك..

حُكم بتقادُم

أنا ما افتكرش

وما أنصحكش

لأ.. ما تحاولش