بس اطلب بس أو اتمنى
لو عايز شعر وفيه ادهاش
لو عايز شعر من ال جنة
عندها تقسيط أو فوري وكاش
وهتفهم بعد م تتأنى
الشعر الأجمل لسه مجاش
احنا مقولناش اننا جامدين
أشعارنا بتتكلم عنّا
توليفة حب وجد ودين
أشعار من جيل تنه ورنه
الشعر معاها يبان رجعي
لكن نظمها كله حداثه
بتعالج وجعك أو وجعي
وكانها واخداها وراثه
شعر من النجع الجواني
سحباه من ايده على البحري
وف غمضه عين أو ف ثواني
تبنيلك بيه عالم سحري
احنا لا بنمط ولا نرقع
ولا شعرنا باهت ومبقع
ولا بنخزنه جايز يغلى
لا بتاجر ولا بعرف اسقع
الشعر معاها أكيد فطري
له ريحه تشوفها ولون عطري
دولة شعرها من غير أسوار
جدها بيبان وكأنه هزار
بردها بيجمد أطرافك
وبيلسع عقلك زي النار
الشعر معاها ملوش أول
وتلاقي الأخر منه يغير
هتلف ف ثانيه وتتجول
وسط المعمعة من غير تحضير
هتشوف تكسير
على دق عظام
فوضى ومحكومة أكيد بنظام
وبرغم الفوضى هتتمتع
وهتصرخ
بس
كفاية
حرام
وتلف وترجع من تاني
وتجيب م الشمخ الجواني
تنهيده
وتقعد تستنى
لقصيده جديده من ال جنه