لا تنبهر بالغرب يامن تمرّه
ولا يغرك به جمال الطبيعة
لقيت فيه ارزاق واعمال حرّة
وقانون وضعي والمذاهب وسيعة
ولا للقيم في مجتمعهم مبرّة
والسوق الى ماطاوع امرك تطيعه
عالم على فعل الرذيلة مصرّة
ما يرغبون اهل النفوس الرفيعة
تشوفهم كلا بكلبه يجرّه
ملبسه حلّية يامال القطيعة
واثيابهم يالله دخيلك تشرّه
الحال مزري والمناظر شنيعة
لو حصّل المسلم علوماً تسرّه
ياسرع ما يلقى وراها فجيعة
ويذوق بعد الحلوة الفين مرّة
خصوص اذاكانه في آخر ربيعه
انا اشهد ان العيش معهم معرّة
مثل الذي تقفل عليه القريعة
قلته وانا مابغي لواحد مضرة
ودي يكون الوضع وفق الشريعة
وكلاً على كيفه يحدد مقرّه
أما انحدر والا ظهر بالطليعة
وانا كرهت الغرب خيره وشرّه
لو ان لي به قصر بالدّين ابيعه