يا ليّن العود لان القلب مع عودك
من عقب ما كان صلب اقسى من الصبه
يوم استدار الهوى ما زاد مجهودك
قامت تصافق عليه النود وتهبه
تلعب به الريح مثل ملاعب جعودك
الي ليا مره النسناس يلعبه
وراك ما تروي العطشان قرهودك
تراه يطرد سراب اللال ما كبه
حط الرجا يا بخيل الوصل في جودك
يا ليت سمح القبال يخاف من ربه
يشمك الورد ويحبك على خدودك
هي والله الوجنه الي حقها الحبه
حتى شعاع السفر في لبة نهودك
يمكن تدنق عليه الشمس وتحبه
واحساسك العذب لو خفيت مقصودك
يظهر حصيل العيون الي ورى الغبه
تبرق قنوف السحاب البيض من سودك
حسبي على الضحكه الي كانت السبه