ليت العذر يغفر ذنوب الخطايا
من يوم رديت التحيه وصديت
ورد المشاعر في شراعك ضمايا
وانا على طول الجفا ما تربيت
ما اغير ادور صورتك فالمرايا
ما جتني الفكره عشان اكتب البيت
انتي حديث النفس مثل النوايا
واحساس روحٍ عايشه قي جسد ميت
تعطيك نظرات العيون الخفايا
اخذ اول الفنجال لو ما تقهويت
نفح الصبا نسمة جديل الصبايا
الي لها مع طلعة النور توقيت
تغطي برمشٍ من سهوم المنايا
صوابه الدامي عبار وتناهيت
كنه بنادقٍ عسكرٍ في سرايا
اليا رمتني بندقه ما تتقيت
والعين عين موكرٍ في حجايا
شيهانةٍ في صدرها دق كبريت
طرح الشبك ماهي مزاد وشرايا
عبورها صحراء الحماده وتكريت
اجمل سنين العمر واغلا الهديا
الي تمناني وانا ما تمنيت
يا جامعٍ زين العباد البرايا
وراك من كثر الحلا ما تبريت
تخفي عن عيوني عذاب الحلايا
واليا بغيت اشوف وجهك تغطيت
جرحي مسوي في حياتي سوايا
وانا لو امرض يوم اشوفك تعافيت
سجنت حبك فالضلوع الحنايا
سجن الغريب الي قيوده مزانيت
انا عيوبي في عيوني مزايا
كفنت ذلي في جنازه وصليت