العيلم الي ديرته مرتع الريم
جعل الحيا يسبق غزالٍ يزوره
من كثر حبي له مبديه بالغيم
ابيه كل اسبوع يرسل سبوره
تستقبله غر المزون المراديم
لين الثرى ياخذ من الجو صوره
اربع حروفٍ نصفها الالف والميم
احبها من كثر حبي ل نوره
غيداً تحد الي تصافيه للضيم
اليا فقدها يوم يفقد شعوره
توي دريت ان الهوى له مفاهيم
في شرعه تصيد الغزال النموره
صبري قضا وانت القدر والمقاسيم
مالي نجاه من التعب والخطوره
جذع النخيل الي عذوقه مكاميم
يشبه جديله يوم يعطيه دوره
والمبسم الي فيه من عين تسنيم
من جمته ما احد شرب من بكوره
والعين عين الي وكوره مراضيم
طيرٍ وحش ما قيّد السبق زوره
رفضٍ جناحه فيه من ربوة السيم
لا شافه الحاكم قنع من طيوره
شوق الشجيع من الرجال الشغاميم
نفسه على بنت النشاما غيوره
ما بدلت بيض النوايا مجاهيم
شرهة بنادقنا ماهيب معثوره
فك القيود من الثنين المظالم
خل الصبا يلفح علينا عطوره
ما فالهوى فتوى ولا فيه تحريم
الحب نعمه والذنوب مغفوره