يا خالد اسمع ما طرالي وأنا أبوك
واللي بقوله جاك في هيئة أبيات
طرزتهن من دون الأقلام والبوك
واسترسلت أفكار والِدك بسكات
تكبر وتلقى من بالأصحاب يغلوك
أللي لهم مع طيب الأفعال وقفات
ذولا يمينك ما بهم ريب وشكوك
والصاحب الصاحب له الود وإن مات
وان شفت ما شافت عيوني وخلّوك
ربع المصالح ساعة الضيق بشتات
خلّك جبل لا تحزن آ بيوم عافوك
تبدي لك الأيام ما كان وان فات
دم الحيا في وجه الأنذال مسفوك
واحيائهم يا بوك في حسبة اموات
أللي ليا من غبت بالحال ذموك
لوّك عليهم مرخص الروح والذات
خذها نصيحه يا ولد عطهم آ بلوك
ما هي خساره لو قطعت العلاقات
واللي بعلم الغيب يابوك محبوك
اقنع بما ياتيك وشلون ما جات
ل اتغرّك الوردة ترى حصنها شوك
والشوك ما يقرا للإنسان نيات
وان شانت الدنيا ترى الصبر مبروك
أصبر ترى يابوك للوقت ميلات
لا تبدي الضيقة لو الناس حدّوك
رزقك على اللي دعّم الحقّ بثبآت
تضحك لك الأيام وأيام بضنوك
ولا تطلب إلا الله في كل الأوقات