ياترى أصطبحتى بوش مين يامصر
الفقرا الل عايشين يحلموا
ولا الأغنيا اللى قاعدين ينهبوا
ولا بكل اللى اشوف انجازاتهم أقول يسلموا
ولا بكل اللى ماأصبح عليكى
ولا بعساكرك اللى بقى لهم ستميت قصر
بعد مادابت جنابهم من غصن الجريد والحُصر
مين يصدق تعدادنا ومين الأمين فى الحصر
احنا بس اللى منقوعين هموم للركب
ليه يارب خلقت لنا الُرتب؟
ما عليتش ناس من دون الناس إلا لحكمتك
أنا واحد م الخلق اللى مأمنه بكلمتك
ومصدق إن لابد الغنى يعطف ع الفقير
إن شاالله يلبس دهب وينام ع الحرير
بس ماينامش آدمى يحلم بالعشى
نارك مسيرها للى خان وزيف وأرتشى
مفيش حد م اللى عرفوا الحقيقة تاب وأختشى
لحد أمتى يارب هاستنى تصلح حال الكون
وأشوف ميزان عدلك ع الأرض أتنصب
مش حقى بس اللى بيضيع... ويغتصب
دحنا ملايين من فوق ملايين بيملانا الغضب
ملايين م اللى أديتها قوة ع الصبر وع الجلد
ونا واحد منهم صابر وكل لحظة ضهرى بيتجلد
جوه البلد وبره البلد وفين ما أتوجد
ألحق فى حق روحى بسرعة يضيع ويتؤد
اللى يدوّلو منصب سرعان ما يشترى ويبيع
واللى نحط عشمنا فيه... يعلا ع الجميع
مين غيرك أنت الملك... مين غيرك الشفيع
أم مش لاقيه حاجة فى صدرها تديها للرضيع
وأم باتت تدعيك يارب تفرج ع الجميع
وأم شايله فى قلبها سوء البخت الفظيع
وأم مش لاقيه إلا فى شقاها السد المنيع
لجل ماتصون عرضها م الزانى الوضيع
وأم بتعلم ولادها فى المدارس يخيبوا وتضيع
حقاش يطلع لها حرامى وهو اللى يشترى ويبيع
وأنت عالم بكل دا وأديتنا ضعف للصمود
لحد مالحق ياخد حقه وإليك نعود
والشاطر فى البلد دى اللى يعرف يحل قضية
ون كانت لقمتى الحلال بحياتى صعبه وعصية
بحلفلك قصاد قدرتك أمنت وسلمت أمرى
تحفظنى وتحفظ زلتى من الخطيئة وكل معصية
وتطلعنى م البلد دى على خير بلا تركة... ولا معصية