وانا ابوك كفكف دمع عينك بديت انهار
ترى دمع عينك يقطع عروق شرياني
لو ان الدموع الها مع العين قصة ثار
تحارب عيوني نومها كل ما جاني
يسبب شريط الذاكره حالة استنفار
على الي غيابه هز روحي ووجداني
احبه وحبه فاتقٍ فالضلوع ستار
اغطيه مير الوقت بالحزن غطاني
عليه العيون من الوله دمعها مدرار
سحابٍ مصبه بين كفي وذرعاني
تفاصيل وجهي من يشوفه وراه اسرار
لا مر الغريب وشافني ما تعداني
انا ما تشاوى جرحي الاول المحتار
قبل لا تسبب يا عمر جرحي الثاني
تبى تشوف قبرن طول عمقه ثلاث امتار
انسّيك لكن تذكره واتناساني
عليه النصايب كل عبره ودمعً حار
وراك تهشم هشمت صبري وسلواني
ترانا طراقي كلنا يا غريب الدار
فراش الحشا ما يدهله كل قوماني
تطول الدروب ونلتقي ف اخر المشوار
انا ما بغيت اعيش مير الله احياني