تعال مبطي ياغناتي اناديك
تعال كافي لا تزود عذابي
تعال عط كفي بطيب اياديك
تعال خفف في غيابك مصابي
تعال نرجع ياحبيبي لماضيك
ونحسب سوى مع بعض مابك ومابي
قبل امس كنت تقول ماقدر اجافيك
وانك بدوني تعيش جو اكتئابي
وبالامس جيت تقول ياكثر ماغليك
وانك متيم بي وتكره غيابي
تكره معاديني واكره معاديك
وتعشق ثرى موطى حضرة جنابي
واليوم وين الحب ارخصت شاريك
لا وحسافه وين حبي غدابي
بعدك غرقت فبحر الاحزان ناهيك
عن بسمه مبطي ماتحلت بنابي
اعشقك ماهو عشق هذي وهذيك
عشقٍ نثرته فوق اسطر كتابي :
عشق الترف فعيون فقر الصعاليك
عشق العطش لهطول وبل السحابي
عشق الظلام لضي نور الاتاريك
عشقي لعشقك ياعشيقٍ سطابي
حتى تصدق من كثر ما اناجيك
تمنعني طيوفك ابدل ثيابي
ظامي ومانع عني مية سوانيك
يرضيك تذبحني ظمى في شبابي
عالي ومتعالي في برج عاجيك
حاجبك عني غيم وافق وضبابي
لو ظرف مقنع من ورى البعد حاديك
برضى وبرحل في يديني زهابي
لكن تغيب وتنكر الي مواليك
تلك التي ماقدر عليها احابي
صحيح كنت اقول مانيب ناسيك
وانك مميز غير كل الصحابي
لكن اذا صديت ماو الله اجيك
ترى ذهابي غير ماله ايابي