إحساسي اليوم ماله داخلي صرفه ،
فيني عتاب وحكي والصمت يملكني
اروح وارجع من الغرفه على الغرفه
متعبني البعد والحرمان مهلكني
ودي اسولف مع اي إنسان ماعرفه
يسمع كلامي واذا خلصت يتركني
من اول الموت لو أقف على جرفه
ثبت والخوف ما يقدر يحركني
والحين نفسي من ابسط شي منقرفه
حزين حتى عيون الناس تربكني
الضحكه اللي تناظرني من الشرفه
متى على الله تمد يدها تشابكني
والدمعه اللي على الغالين منذرفه
في وحدتي غيرها محدٍ يشاركني
كل الأحاسيس مهزومه ومعترفه
اهرب وذكرى زمان الحب تمسكني
احساسي أني اعرفه وصرت ما اعرفه
أقسى من احساس قلبه يوم يتركني