انا والليل والقمراء قبل يطلع علينا النور
تسامرنا على ضحك وتوادعنا على عبره
سليٍّ سامر وناسي ولالي فالنياح طيور
ولاعلمي سوا طيفٍ يشابه نايد العتّره
اغصب القلب لايحزن واجض ان العيون تثور
اخاف الدمع مايصبر ويقرح لا طرا ذكره
عليك الله في رجلٍ يسج الرجل دون شعور
يصبّح في حضاف الارض ويماسي على قفره
يمر من القطين ارب يلقى طارشٍ مذكور
مجيه من ديار الي ضمت عيني على سبره
عليها نايح الورقى تدك الخافق المقهور
تقاسيم الحزن غنّت ودكت داخلي قصره
ياجملة من نشد حالك شليّ ولاعليه قصور
عليك الله لاتحدى صويبٍ حالته خطره
ماحزني بيّن بصوتي ولايفضح لي المستور
عليك الله ماحزني يبين غير فالنظره
وجودي وجدة السالي من الحله عليه الدور
ولايدري عن النازل ولا يدري عن النشره
يراقب ساعته باقي على العشره تلف تدور
وسج ودمّعة عينه وباقي عادها عشره
ياوين الي على شانه أعد الشاعر المشهور
واجيب الي ماغنابه جرير وثّلة البصره
واعد لمسمعه طرقٍ يغرف من البحور بحور
واقول اليا ابتسم ماجاك من بحري سوا قطره
سلامي يابساتينٍ تضم من الزهور زهور
حرامٍ مافتن شوفي ولا لدّه سوا زهره
لها فوحٍ من العنبر ومسكٍ خالطته عطور
تلد الانفس لطيبه.. ياجعلي فدوة لعطره
لايا ام الزين وام الغنج يادِعّج العيون الحور
لاياخلٍ خفوقي له يغني معلن الهجره
ياوجهن ينور الدنيا ويفهق غاسق الديجور
ياصدرٍ ياهني الي غفى واصبح على صدره
ترا قلبي على خبرك وفي وعاشقٍ مامور
كما طفلٍ على الفطره ولاخالف عن الفطره
وكانه خالف الهقوه علي من النذور نذور
لعده كافر وواجب قصاص الحب في كفره