يا حبيبي والمحبه حاجةٍ تبقى عظيمه
لا تطاوع شكّك اللي بات يعثى فالخفايا
قلبٍ اسخى لك بحبّه من سخى الوسمي وديمه
ليه تقتل حسن ظنّه لك بسكّين المنايا
والعمر يبقى مجرّد رقم لكن دون قيمه
لانقضى من دون طعم الحبّ وش له من حلايا
ما اعترف من صغر سني بانكسارات الهزيمه
ولا يزيد شموخي الاّ( للهوى قبر وضحايا )
والحقيقه لو تكلم بعض اشياي السقيمه
كان تسمع للحقيقه فيّ بشفاه المرايا
خلف وجه الضحك تلقى عبره وغصّه مقيمه
وبين بسماتي تأمل تكتشف ( سرّ الحكايا )
يا حبيبي والخواطر للوصل باقي مهيمه
لا تمنّيها لشوفك ثمْ تصدّرها ظمايا
اكسني من ستر وصلك فان بعض الوصل شيمه
لا تخلي هالمشاعر قدم خلق الله عرايا
لا تخليني نديمٍ يشتكي فرقى نديمه
وانت حبّك قد وسمته في معاليق الحنايا
وين ما لديت فكري شفت لك صوره قديمه
ووين ما وجّهت وجهي شفتك بكلّ الزوايا
دار دمعك قبل يجرح من عيون المزن غيمه
وتّناثر بالسحاب العذب غرّات الرفايا
الهوى شيمته وصلٍ منك يا مال الغنيمه
وش هوانا لا فقدها حلو وصلك والتحايا
واقطع ظروفٍ تردّك دون قلبي يا غريمه
الظروف احيان تلقى من يخلّيها مطايا