بقى بالذمة دي حاجة تفرح
والا دي حاجة تجيب الغم
لما نشوف اولادنا بتطلع
شايلين خيبة وحبة هم
ودي مش خيبة
دي مليون خيبة
لما تشوف انت ح تعذرهم
ويجوز تبكي عليهم دم
نجري قوام ونقول تعليم
نفضل نجري ع التقديم
نسهر ليلنا ونشقى ونتعب
حتى نوفر كم مليم
ابن السته حياخد درس
قلنا وماله يلا نخس
نربط حبه ف حبه ماناكل
الا يدوب بطلوع الدرس
قلنا اهو بكره حيبقى طبيب
يصلح حالنا اعز حبيب
ماحناش عارفين ايه راح يجرى
ولا عارفين للفرح نصيب
بعد شويه لقينا الواد
دخل الثانوية
قلنا حنعمل وولاد عمي
اكبر جمعية
علشان نقدر نصرف دايما
ع التعليم
اصل المادة حتاخد منا
شيء وشوية
بعد مانشف ريقنا قولولي
جاب لنا كام
جاب في الميه ياودب
ماهو اصله همام
قلنا خلاص الطب اهو اراح
يلا وماله بس ارتاح
يلا قوام نختار كليه
قلنا مافيش غير الإعلام
دخل الجامعة وعدى سنيه
أصله مذاكر ينصر دينه
بعد الجامعة راح ع الجيش
قلنا يسدد برضو ف دينه
خلص جيشه استنى وظيفته
قالو استنى اما يجيك دورك
حيروح فين ماهو تاه من حيرته
يعمل ايه والشور اهو شورك
أصل الدور مش جاي طول عمره
قول لنا حل يكتر خيرك
بقى بالذمة دي حاجة تفرح
والا دي حاجة تجيب الغم
لما نشوف اولادنا بتطلع
شايلين خيبة وحبة هم
ودي مش خيبة
دي مليون خيبة
لما تشوف انت ح تعذرهم
ويجوز تبكي عليهم دم