مفتاح البيت ضاع
مش ح اعرف ارجع تاني
مش ح أعرف اتسحَّب بالليل
بعد الساعة اتناشر
واقلع صحابي بره
علشان محدش ياخد باله
مش ح اعرف انزل الصبح بدري
قبل العيال ما يشقشقوا
مش ح اعرف اتخانق مع مراتي
وأسيبلها البيت
غضبان
ولا ح اعرف استهبل
وادخل عليها ببوكيه ورد
وهدية رخيصة
كإن محصلش حاجة
مفتاح البيت ضاع
إيه التوهان دا كله؟
الشارع مبقاش هو الشارع
ولا الشجرة العجوزة المخوخة
هي الشجرة العجوزة
المخوخة
اللي ما عليهاش عصافير
ويافطة ممنوع الانتظار بين العلامتين
مش مدياني فرصة أقف شوية
وافهم اللي بيحصل
هو إيه اللي جرالي بالضبط؟
الأرض اخشنت تحت رجلي
والمسافة بينها وبين السما
زادت مرتين
وكل الحاجات
بتبصلي مكشرة
مفتاح البيت ضاع؟
ولا أنا اللي ماشي في الشارع
باعيّط
لوحدي
مش لاقي حد كبير يدلني؟