بفكر اكتبلك رسالة
أولها مملكتی فی السماء
وآخرها مملكتك فی الأرض.
بفكر أسجل دموعي بالليل
علی شريط وابعتهالك
بفكر اقطع اعضائی
وابعتهالك فی طرد.
مفيش حاجة محددة
يمكن برفانك
اللی ريحته
مبقتش تظلل عليا
يمكن طيفك
اللی زيارته
مدججة بالجراح والخساير
يمكن انسحابك التكتيكی
ونظراتك المربكة
مفيش حاجه محددة
انتي الحبيبة والعدو
وانتي احتدام المعركة
وأنا فی الحالتين مهزوم
وبشاور بعلامة النصر.