لا تقول تامرني على شي وتروح
خيبتني باتفه طلب ياظنيني
لا مابقى غير الشكل فيك مملوح
الخافيه تندب عليها سنيني
تعبت مراسيلي على بابك تلوح
وخليتها مابين قسوه وليني
كنت بحياتي شي راقي وممدوح
كنت اتّمنى دوم تمسك يديني
والباب في دربك على الفكر مفتوح
ان جيت ابسئل عنك اباقول ويني
والقاك صادق كلك افراح ومزوح
واتوه في ضحكك.. عبث تحتويني
اتغيّر اللي كان بالقلب مفضوح
لحظه ورى لحظه ويبدا يشيني
اول ابي عونك وعطرك بي يفوح
واليوم مابه غير ربي عويني
كانك تبي تطلع من القلب مسموح
غيرك ورى البيبان يسئل يبيني
ماكان لك يارهيّف العود مصلوح
مير ابتديت بجفوتك تبتليني
امس الجفى ماهو مع العين ملموح
واليوم سقته سوق بينك وبيني
مات الوفى والا الخطا كان مدموح
حتى ولو ناديت وش له تجيني
من يوم غابت شمسك وجيت بوضوح
وقلت لمتاهت سكتك احظنيني
حسيت بان الشكل باقي بلا روح
وعرفت بإن الحال صعبه يبيني
لاتقول تامرني على شي وتروح
روّح ما ابي حاجه ولا انته ظنيني